تۇرعىنداردىڭ تۇرمىس ساپاسىن جاقسارتۋدىڭ ءبىر جولى — مەديسينالىق قىزمەتتىڭ قولجەتىمىدى بولۋى ەكەنى بەلگىلى. حالىق دەنساۋلىعىن ساقتاۋدا العاشقى دارىگەرلىك كومەكتى ءتيىمدى ۇيىمداستىرۋدىڭ ماڭىزى زور. بۇل رەتتە جامبىل ءوڭىرى جۇمىستى جۇيەلى جۇرگىزىپ، رەسپۋبليكا بويىنشا العا شىعىپ وتىر.
وسىنى باسا ايتقان بەردىبەك ساپاربايەۆ دەنساۋلىق ساقتاۋ ءمينيسترى ەلجان ءبىرتانوۆقا ەلدى مەكەندەردى امبۋلاتوريالار جانە مەدپۋنكتتەرمەن قامتۋدا وزگەشە ۇلگى كورسەتىپ، مەملەكەتتىك-جەكەشەلىك ارىپتەستىك تەتىگىن ءتيىمدى پايدالانىپ وتىرعان جامبىل وبلىسىنىڭ تاجىريبەسىن وزگە وڭىرلەرگە تاراتۋدى تاپسىردى.
كەزدەسۋدە ۆيسە-پرەمەر كەلەر جىلدان باستاپ ەنگىزۋگە ۇسىنىلىپ وتىرعان اتاۋلى الەۋمەتتىك كومەكتىڭ جاڭا جۇيەسى تۋرالى دا ايتىپ ءوتتى.
«شىن مۇقتاج ازاماتتاردى الەۋمەتتىك تۇرعىدا قورعاۋ ءۇشىن ءارى ماسىلدىق پيعىلدى ءورشىتىپ الماۋ ماقساتىندا ۇكىمەت اتاۋلى الەۋمەتتىك كومەكتى تولەۋدىڭ مەحانيزمىن وزگەرتۋدى ۇسىنىپ وتىر. ءبىز ءبىر نارسەنى ءتۇسىنۋىمىز كەرەك. بۇل — اتى ايتىپ تۇرعانداي، اتاۋلى كومەك. جىل بويى تولەنەتىن جالاقى ەمەس. ول قولداۋعا ءزارۋ وتباسىلارعا الەۋمەتتىك جاعدايىن تۇزەپ الۋ ءۇشىن بەلگىلى ءبىر مەرزىمگە تاعايىندالادى. ەكونوميكانى تۇراقتاندىرۋدىڭ جولى — ەڭبەك»، — دەدى بەردىبەك ماشبەك ۇلى.
پرەمەر ءمينيستردىڭ ورىنباسارى سونداي-اق مۇمكىندىگى شەكتەۋلى جانداردى وڭالتۋ ماقساتىندا بەرىلەتىن ارنايى قۇرىلعىلارمەن قامتۋ جۇيەسىن جاقسارتۋ ءۇشىن ارنايى پورتال اشىلعانىن دا تىلگە تيەك ەتتى. ءتيىستى قۇرال-جابدىقتارعا تاپسىرىس بەرۋگە تەندەر ەڭ ءتيىمدى جول ەمەس ەكەنىن، سونىڭ سالدارىنان بۇعان دەيىن قولداۋدى قاجەت ەتەتىن ازاماتتاردى كەرەك قۇرىلعىمەن قامتۋدا كەدەرگى تۋىنداعانىن ءسوز ەتتى. ارنايى پورتال ەندى وسى تۇيتكىلدەردەن قۇتىلۋعا مۇمكىندىك بەرمەك. جيىندا جۇمىسپەن قامتۋ، ءبىرىڭعاي الەۋمەتتىك قور جانە ءبىرىڭعاي الەۋمەتتىك تولەم تۋرالى دا ايتىلدى.
ۆيسە-پرەمەردىڭ جامبىل جۇرتشىلىعىمەن جۇزدەسۋى ەركىن فورماتتا وتكەنىن ايتا كەتكەن ءجون. تۇرعىندار بەردىبەك ساپاربايەۆقا كوكەيدە جۇرگەن سۇراقتارىن قويىپ، وزەكتى ماسەلەلەردى العا تارتتى.
پىكىر قالدىرۋ